Frauen 2 2024-08-27 Turnfahrt, Gurten (BE), 858m

07:31 h HB W'thur – HB Bern, Kafi/Gipfeli im Toi et Moi Bern, BLS Bern – Wabern, Gurtenbahn Wabern – Gurten-Kulm 858m, Spaziergänge, Mittagessen im Tapis Rouge auf dem Gurten, Spaziergänge, Rückfahrt Gurtenbahn – Wabern, Citytram Wabern – HB Bern, Freigang Altstadt Bern, SBB HB Bern – HB W'thur 19:08 h

De Zug tuet super pünktlich in HB Winti inerolle
chunt alli wo uf Bern wänd choge abhole.
Im Toi et Moi z'Bern – churz nach em Nüni
gits i de Gartebeiz Kafi/Gipfeli zum Znüni.
Nach BLS und Gurtebahn – e chli spöter
Wow, de Huusberg Gurte Kulm mit 858 Meter.

An Fuess vo dem Paradies schmiegt sich Bern ane
vo obenabe nach Wahrzeiche sueche cha me.
Bundeshuus, Ziitglogge, Mattequartier i de Aareschlaufe
Marzili Bahn und Arkadelädeli zum Sache chaufe.
Wankdorf, Museum Paul Klee, Flughafe Bern Belp
Museumsviertel und Inselspital für erschti Help.

Es Müü wiiter äne lockt de Weg um es Ränkli
zu de Panoramacharte, zu Bäum und zu Bänkli.
Und lueg – d'Berner Oberländer 4000iger ganz wiit hine
d'Gigante Eiger, Mönch und Jungfrau mit schneewiisse Zinne.
Und ersch uf em 22 Meter höche Uussichtsturm
erläbsch s'Highlight Top of Gurte Kulm.

Au für d'Chind häts sooo viel lässigi Sache
wo si chönd mit de Gspönli zäme mache.
Muetig Rodelbahn rutsche, gmüetli Dampfzügli sitze
Umetobe, tschutte, Grillwurststäcke spitze.
Picknicke, Spieli mache und Glace schläcke
sogar de eige Nuggi an Nuggibaum hänke.

Vor luuter umeluege fascht na de Zmittag verpasse
also – ine is Tapis Rouge und feini Sache fasse.
Uf Terrasse use dämit und alles bi Sunneschii gnüsse
vo pressiere wet hüt gar niemer öppis wüsse.
Trotzdem, es isch doch scho ziemli im Namittag ine
drum jetz vo rundum d'Fraue zäme bringe.

Zur Talfahrt mit de Gurtebahn nach Wabere Bern
e chli Citytram fahre macht me immer gern.
Für en Ufenthalt i de Bundesstadt bliibt na Ziit
i d'Altstadt füre isch es gar nid wiit.
Dur de Laubegang flaniere, im Schatte, am Märtplatz verwiile
as Tischli sitze, es Bierli bstelle, en Zaungascht bliibe.

D'Heifahrt chömer ruhig des SBB überlaa
nume – zum Bahnhof übere müe mer jetz sälber gah.

Ich danke em Felix und de Ruth Weber für d'Begleitig bi de beide „Probereise“ und de Turnfraue2 für ihres Inträsse a dem Turnfahrtvorschlag. D'Föteli hät au d'Ruth Weber gschosse und d'Nelly Züblin hät's wiä immer für d'Homepage parat gmacht und wiitergleitet – danke!

Uschi Boo, FR 2