DTV Seen 2024-04-05 Ehrenmitglied Melanie Egli

Vor ziemlich genau 30 Jahr het dReis vo de Meli – damals Gertsch – bim DTV ahgfangen. Sie isch als 1. Klässlerin id Meitliriege cho. Trotzdem, dass sie es Jahr später au mit em Grätturne ahgfange het, isch sie no bis id Oberstufe ide Meitliriege bliebe. Ide Grätriege het mer früh gmerkt, dass sie es Leitertalent het, so het si sobald sie zu de Grössere het chöne wechsle, bi de chlinere als Hilfsleiterin ahgfange die erfahrene Leiter zunterstütze. Nach 3 Jahr het sie den im letste Jahr vor de Uflösig vo de Grätriege au ihri eignig Gruppe gleitet. dJasmine Pedrett het sie den chöne überzüge ide Meitliriege wiiterzleite – und bis hüt het sie da demit nie ufghört.. Sie isch ununterbroche für d Meitli da gsi, isch ihgsprunge wo immer es sie grad brucht het. Sie het jahrelang Hauptleitige inne ghalte, ziitwiis sogar vo de mittlere und grosse Meitliriege gliichziitig und isch sit 2007 au üse J+S Coach. Im 2007 het sie au s’Kassier Ämtli übernah welles sie denn 10 Jahr gführt het. Wer jetzt denkt, sie segi denn chli chürzer trete – falsch denkt. Sie het nämli im 2018 d’Hauptverantwortig vo de ganze Meitliriege vo de Daniela übernah. Als wäri das nid scho gnueg, het sie au na erfolgriich d Sprunggruppe als Gmeinschaftsprojekt vo de Jugi- und Meitliriege-Oberstüüfler uf d Bei zoge und üs so wunderbar für d Aktivriege vorbereitet. Ihre riesigi Ihsatz het sich au im 2022 nid reduziert wo sie Mami worde isch – iihdrücklich wie viel Energie sie het!

Zudem het sie au für de JET diversi Mal tatkräftig mitgholfe, sie isch sowohl im 2013/14 als au im 2022 und etz wieder im 2024 im OK gsi. Das isch zwar vo siitens TV passiert aber minere Meinig nah eng verbunde mit ihrem riesige Ihsatz für üsi Jugend und deshalb au da erwähnenswert.

Spätistens jetzt isch glaub jedem klar – d Melanie Egli het sich en Platz als Ehremitglied vom DTV Seen eidüütig verdient. Danke dir für din grossartige Ihsatz und herzlichi Gratulation!

Winterthur, 5. April 2024 – Aline Lindegger