Hüt wiä au scho i dä letschtä Jahrä

isch bim „Burehus" än Rösli-Car vorgfahrä.

Mit 23 wietgehend na mobilä Damä

hät dä Roland schtolz än Tag lang dörfä umäfahrä.

D'Marlies hät dänkt, äs seg sichär ächli schwierig für euis Altä,

bis am Mittag s'beschtellti Menü in Erinnerig z'bhaltä.

Chüächli mit farbigä Fähnli hät sie drum mitgnoh,

damit au jedi s'richtige sött übärcho.

Han i Hackbratä odär han i Fisch?

Dass ja kein Duränand entschtaht am Mittagstisch!

Nach Züri, Adliswil, Albispass und Mettmenstetten

hät dä Chauffeur dänn im Hörnli z'Knonau ghaltä;

ich glaub, dem häts na gfallä mit euis Frauä im beschtä Altär!

Da häts für alli än Kafi und äs feins Gipfeli gäh,

wer das nöd hät wellä, hät au öppis andärs chönä bschtellä.

Viel schwätzä hämär au chönä mitänand

bi därä schönä Fahrt durch Wiesä, Wald und Land.

Z'Zug hämär dänn na Ziet gha zum schpaziärä und flaniärä,

bis s'Schiff isch cho nach Immensee

für a tolli Fahrt uf äm Zugärsee.             

Im Hotel Rigi Royal diräkt am See da hämär gässä,

z'sägä, s'seg erschtklassig gsi, isch sichär nöd vermässä.

Mir händs i vollnä Zügä gnossä

und na mit ämä Gläsli guätäm Wy begossä.

Am See nah bis uf Arth-Goldau und dänn übär dä Steinerberg,

Sattel, Rothenthurm, durchs Hochmoor und Schindellegi

isch's nach Feusisberg id Höchi gangä.

Im Landgasthof Ried uf dä Terrassä simär dänn au na anägsässä

mit ämä Superblick uf dä Zürisee,

da häts dänn namal öppis flüssigs gäh!

Dänn isch äs langsam hei zuä gangä,

jä nei abär au, was isch dänn das da uf äm Seedamm

für a langi Autoschlangä?

Ueber Wetzikon nach Winterthur isch Ziet

dänn abär schnäll vergangä,

di eintä händ scho wiedär ufs „Burehus" diheimä plangät!

Superwättär hämär gha, dä ganz Tag nur Sunnäschie,

wänn soviel Aengeli reisäd, cha das ja nöd andärsch sie!

Ganz än schönä Tag hämär zämä gnossä,

leidär isch är nur z'schnäll verflossä.

Mir freuäd euis scho ufs nächschti Jahr

und uf äs wietärs Reisli mit äm Rösli-Car.

Bedankä für d'Organisation und für diä vielä Schpändä

möchtäd mir euis jetzt na zum Schluss.

Hoffätli bliebäd alli euisi Seniorinä na vieli Jahr so guät im Schuss,

dass mir na lang chönd Gmeinschaft pflägä,

a dem isch sichär allnä vo euis viel glägä!

Artikel kommentieren

Nur registrierte Benutzer können Kommentare schreiben.
Bitte melde Dich an oder registriere Dich.

Powered by AkoComment Tweaked Special Edition v.1.4.3