En Vorschlag us em Vorstand - und ich dörfs verzelle

e Wahl wo mir schüli gern händ welle

wänn sie so wichtig isch, das eini däfür ufstaht

wüssed'er gli um wen's hüt zabig gaht

E bsunderi Turneri hämer us de Reie zoge

s'Leischtigsblatt zäme churz überfloge

ah - im Novämber 87 zu de Fraue 2 cho!

Oh - 2 Jahr druf scho's Kassieramt übernoh!

Vo 1989 - 2000 i d'Finanze vergrabe

bewahrt sie de Verein vor Schuld und Schade

kein Rappe wird i di falsch Kolonne buechet

au wänn d'Revisore na so pingelig sueched

Wer Gschäft mit so vil Uebersicht cha länke

dem cha me - wänn mögli - mee ahänke

a de GV 2000 sötted mir e neui Präsi ha

mit ihre ganz eigne Glasseheit seit sie - ja!

S'isch so - mir händ sie im Amt na nie gseh haudere

bi Vorschläg und Entscheidige aber au nie zaudere

wänn sie d'Mittwuchsitzige i ihrer Stube leitet

sind d'Unterlage perfekt vorbereitet

Farbigi Riiterli und chopfüber abgleiti Schriibe

hälfed unnötigs Sueche und Ghäder vermiide

dank ihrer patente Ordnertechnik bliibt

für's gmüetlichi käffele viel meh Ziit

A pro po Ziit - eis dörfed mir gar nie vergässe

sie isch nid nur über Vereinsschrifte gsässe

15 Jahr bi dä Mäntigfraue fit und gstählt

wird sie 2003 zum Aktivfreimitglied gwählt

Chönd dänke, näbscht em DTV isch nid eifach nüt

au privat wird sie gschätzt vo ganz vil Lüt

für di Liebschte de hei isch sie unentbehrlich

quasi mit Rundum-Service - ehrlich!

Ihri drü Chind sind dobe, de Ma isch pensioniert

gottlob wird d'Hushaltarbet so halbiert

als zweifachi Grosi stönd neui Pflichte n'a

und es Büsi und en Hund sind au na da!

Bruchts dänn doch e mal Momänt zum relaxe

packt sie - und haut's uf Obersaxe

d'Feriewohnig i de Bärge isch's bescht Rezäpt

wä me bständig so vil um d'Ohre hät

Tja - bald 64-zgi wird sie jetz'

e gründlichi Schafferi ganz ohni Ghetz

immer ufgstellt, zfriede, eifach nett

als wänn's nie greizti Nerve gäbt

22 Vorstandsjahr gilts z'überschaue

e unerhörti Leischtig - liebi Fraue

es tadellos gfüerts Präsidium - bis hüt

z'mäckere und z'flicke dra - gits nüt

So hät's Vorstandsteam - under Stillschwige wahre

abgmacht - was Präsi ersch hüt dörf erfahre

sie - so wetted mir de Versammlig vorschla

söll im DTV d'Ehremitgliedschaft ha!

Gschätzti Turnerinne - alli da im Saal

gälled, ihr sind iverstande mit de Wahl?!

Stönd bitte uf - dää würdig Momänt z'erläbe

dem grosse Verdienscht mit Achtig z'begägne

von ere Vereinleri mit Liib und Seel

vom Ehremitglied - Annemarie Stehl !

Artikel kommentieren

Nur registrierte Benutzer können Kommentare schreiben.
Bitte melde Dich an oder registriere Dich.

Powered by AkoComment Tweaked Special Edition v.1.4.3